1
Orpheus, erepta cara dum coniuge deflet,
Neglexit dulces seposuitque modos.
Deposuit risum, cantus citharamque fidesque,
Nec tetigit vatis barbiton ulla manus.
5Thracia deflevit resonantis carmina linguae
Ereptumque sibi dulce dolebat opus.
Deflerunt Nymphae, flerunt et achaica Tempe,
Quique colunt portus, Phrixe vel Helle, tuos.
Deflerunt fagi, deflerunt carmina quercus
10Et molles salices duraque corna simul.
Massylae redit ira leae saevosque leones
Impulit et rabidos concitat ira canes.
Non bos impune vidit, vel bucula tigres,
Nec cervi linces, nec timet agna lupos.
15In scopulos fontes conversaque flumina retro
Caelestesque favi toxica saeva dabant,
Inferni postquam spoliavit regna tyranni,
Tergeminumque canem traxit ad astra poli
Alcides, magno cepit de rege triumphum,
20Manibus et domitis ferrea vincla dedit:
Argolici postquam claros videre triumphos
Atque coronatis turba epulata comis
Porricit in fluctus spumantis munera Bachi,
Atque adolent sacris mascula thura focis,
25Tum vates repetit citharam cordasque sonoras
Desuetosque diu concinit ille modos.
Nec puduit canos vatem redimire capillos
Omissumque diu gustat et ille merum.
Et canit Alcidae laudes titulosque perennes,
30Alcidem numero collocat ille deum.
Annosae veniunt modulata ad carmina quercus
Et celsi montes saxaque dura simul.
Sternuntur tumidi fluctus; tum murmura pontus
Ponit et ad citharam Sperchio sistit aquas.
35Murmura deponunt venti coluberque venena;
Et citharae tigres et leo gustat opus.
Nec pavidae pecudes timuerunt ora leonum;
Silvestrem cervus nec timet aege lupum
Atque simul timidae ludunt cum tigride damnae,
40Nec timet accipitris bella coturnus avis.
Sic ego, qui dudum sanctorum carmina vatum
Omisi, repeto fila canora lyrae,
Et me festa dies patriae, me gaudia cogunt
Publica, me patrius scribere iussit amor.
45Publica iam tepidum pertentant gaudia pectus
Et resides animos publica facta movent.
Iam repeto ausonias musas omissaque dudum
Carmina, pegaseae pocula fontis aquae.
This text is part of:
Click on a word to bring up parses, dictionary entries, and frequency statistics
1 principium in secundum librorum Theseidos
carmina minora (Giancarla Pizzato, tesi di laurea Università degli studi di Padova, 1980-81).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.